مقدمة
بقلم شربل بعيني
قصائد هذا الديوان، كتبها رئيس عصبة الزجل اللبناني في أستراليا الشاعر عصام ملكي، وأهداها لي، خلال سنوات رحلتنا مع الغربة. أي أنها كتبت على فترات متتالية، منذ أربعين سنة تقريباً ولغاية يومنا هذا.
والرائع في هذه القصائد أنها تدل على محبّة الشعراء وتقديرهم لبعضهم البعض، رافضة المثل القائل: أصحاب المهنة الواحدة هم أشد الأعداء.
ومن لا يعرف ابن بشمزين الكورة، تلك القرية الغارقة في الشعر والادب والثقافة والكرم، أخبره أن عصام ملكي ينظم الشعر وهو يتكلّم، أي أنه يفيض شعراً لدرجة لا يعرف معها ماذا يفعل بقصائده الكثيرة الرائعة، رغم حفظه لها بمجلدات أطلق عليها: ديوان الملكي الأول والثاني والثالث والرابع.. إلى آخره، زائد مجموعات شعرية كثيرة جمعها في كتب عادية.
وليس هذا فحسب، بل أنه نشر مئات القصائد بأسماء مستعارة مثل: طه قمر الدين، جورج نجار، استيفانوس استيفانوس، زهير طالب، أمين صادق، استيفانوس عودة، عبدالله عبدالله وموس نجار، وغيرهم ممن لم أتذكر أسماءهم.
هؤلاء كلهم "عصام ملكي"، والقصائد التي نشرها بأسمائهم تتنوّع بين الشعر الفصيح، الكلاسيكي منه والحديث، والشعر الزجلي بكافة أشكاله. وما على الباحثين في أدب المهجر الأسترالي سوى الانتباه لهذه الناحية كي لا يختلط الحابل بالنابل، ويثبتون أسماء لا وجود لها في أدبنا الاغترابي.
وقد تتعجبون اذا قلت لكم أن "الملكي" لم يكن يعلم أنني أحتفظ بمعظم ما أهداني من قصائد، كي لا أقول الكل، لأن الكثير منها قد ضاع وللأسف، كونه كان يكتبها لي على أوراق "الرافل تيكت" أو "الكلينكس" في الحفلات التي كنا نلتقي بها، أو كان يسمعني إياها على الهاتف، فأكتبها في كثير من الأحيان على كف يدي كي لا تضيع.
لقد تعبت كثيراً من أجل حفظها، وساعدني في ذلك قريبي كلارك بعيني، رحمه الله، إذ نشر الكثير منها في سلسلة كتبه "شربل بعيني بأقلامهم" التي تعتبر الموسوعة الأشمل لأدبنا المهجري، كونها تحتوي على آلاف المقالات والقصائد التي كتبت عني سلباً أم ايجاباً مع أسماء أصحابها وتاريخ نشرها.
وقد يقول قائل: وما نفع هذه القصائد التي لا تتكلّم إلا عن شخص واحد؟
لهذا القائل أقول: عظمتها.. إنها تؤرّخ لمرحلة مهمة من تاريخ اغترابنا، وتثبت للجميع أن أصحاب الكلمة الحقة أخوة، أكثر مما هم أصدقاء، وأن الشعر الجميل الصادق لا يرمى في سلّة المهملات. وصدقوني أنني لم أجد أصدق من هذه الأشعار "العصامية". فتنعّموا بها إذن. وألف شكر يا اخي عصام على تخليدك لي بكلمات أسمى من الكلمات، فمثلك لا أحد يمسك بزمام الشعر، فيحوله طارة الى نجمة تشع في ليالي العاشقين، وطارة أخرى الى غيمة تمطر فرحاً منعشاً، وما هذه القصائد التي توجتني بها إلا دليل على عظمتك الشعرية ومحبتك الغامرة، فكيف لي أن أرد جميلك.
ـ مقدمة الطبعة الأولى 2014
**
كتاب
شربل بعيني وفي وحق الابن والآب
وهيدي الحقيقه وأنا ما في إلي غايه
قدّم كتير وعطا عندو الوحي مزراب
وما غاب عنو وهج عينين العنايه
التفكير عندو انعرف بالجاليه دولاب
من عند ألله إجا عا الأرض توصايه
حبّيت إعمل إلو قبل النهايه كتاب
يكون البدايه لشعب من بعدنا جايي
**
كريستوف كولومبس
مش عال نكذب عا البشر مش عال
ونقول إنّو المنطفي مشعال
هللي بيحرّو تنينهم جنّو
وحق السما وهيدا حكي يوصال
تا عالم يصيرو بيستمنّو
لا استاهلو الأهلا ولا كيف الحال
فلان الفلاني آدمي منّو
عا المجتمع جايي من الأدغال
وهللي الرذيله خبّرت عنّو
دغري انكمش وقت اللي جال وصال
صاحب "الغربه" دبّرو بفنّو
وكان اكتشافو بهاتف النقّال
يا ضايعين بها الدني غنّو
عنّا بسيدني بالفعل أبطال
وقولو لهل ما بيعرفو إنّو
كريستوف كولومبوس شربل بعيني
عن سطح بيت الشعر "ملكي" قال
**
ذوق عا حلّو
شربل بعيني ذوق عا حلّو
للنثر هوّي وللشعر كلّو
همّو الكبير يخلّد الشعّار
انشالله اللي متلو كبار لا يقلّو
عندي انسمى من خيرة الشطّار
الما بيفهموه من الدني يفلّو
تعودت دقلّو بكل نهار
انصدفت شي يوم نسيت اني دقّ
الهاتف بيقللي قوم دقلّو
**
الطريق طلوع
يا شربل بعيني الطريق طلوع
ولمجلة الغربه انرفع رايه
كلو حلو المقري مع المسموع
عم نسمع وعم نقشع كفايه
الكتاب ما تركو حروف تجوع
عطيو بدايه ما لها نهايه
قلن تا حتى يقصرو الموضوع
قلن تا حتى يخففوها شوي
تا يصير فينا نلحق قرايه
**
سكران
سكران مطفي بمرحبا اضويني
فاقع نهار الحد قنينه
ان كان منّو محترق بدّو
بآخر زماني يحترق ديني
يا شربل اللي متلك انعدو
لكن بعيني وحدك الزينه
طلّق لساني الجزر وبمدّو
قللي عا وزن وقافيه عطيني
يا شربل بعيني إذا احتدّو
حروف الهجا بشي أوف لاقيني
اليوم الصمت مش منعرف حدّو
ضايع صرت من ساعتين زمان
وين القعد عا السكت دلّيني
**
شربل بعيني
المجد بركابو
شربل بعيني المجد بركابو
وما في ظروف بتطعج ركابو
زورق ببحر المسك والعنبر
ونحنا بني الشعّار ركّابو
ما في وحي عا كلمتو تكبّر
عا شموخ عهدو كاتب كتابو
عا سمعتو إنسان ما غبّر
وحرف الهجا طول الوقت بيضل
يشم الهوا ويجخّ عا حسابو
**
محبة العالم
شربل بعيني بكلّنا موصول
وما في حدا ما قال: يا عيني
محبّة العالم حضرتو بيقول:
أثمن ما يملك شربل بعيني
**
ألله ونقطة زيت
بأللـه وبنقطة زيت شو جمّع فنون
شاعر بعيني.. صار ببّو العينتين
نحنا طلعنا فرد عينه بالعيون
وشربل بعين الشعر طالع عينتين
**
طبق الاصل
الشاعر سعاده بيكبر بعيني
هوّي بعينه وشربل بعينه
وكنعان عيسى ربّها بينعدّ
طبق الأصل عن شربل بعيني
**
المحبة جنون
يا شربل بعيني المحبّه جنون
وينك إنت بالعاطفه وويني
شربل بِقلبي مستحيل تكون
ما زال انتَ شربل.. بعيني
**
الشهم الابي
يا ناس وحياة السما يا ناس
الشهم الأبي عم يكبر بعيني
ان كان بدكم تعرفو الإحساس
شوفو شو كاتب شربل بعيني
**
حكي معقول
يا شربل بعيني انت حسّاس
والفول ما كيّلت بالمكيول
بقلك انا وبلسان كل الناس
غير الحكي المعقول ما بتقول
**
زينة الشعّار
شربل بعيني.. زينة الشعّار
بإيدو الدني منعدّها كمشه
بقلب "الصدى" عندو قلم جرّار
وهللي وقف "بستوب" عم يمشي
**
صدى
كل الزهور بتفرح ان طلّ الندى
وبطلّة الحلوين قلبي بينهدى
وبطلّة "بعيني" عم تطير الهموم
متل ما الأشعار عم بتعمل صدى
وتغط مطرح من فرح ما بتنعدى
**
طلّة عيد
شربل علينا طلّ طلّة عيد
عنّ عْلى بالو بشطّنا يرسي
قالت الأهلا: كيفك من بعيد
والمرحبا جابت إلو كرسي
**
شحّاد
بيني وبين المعرفه ميعاد
وتا صير إقدر رجّح العينه
شربل بعيني طبّب الشحّاد
تا صير إقدر إقشعو بعيني
**
مرشح مستقل
هنيّال شربل آخد بإيدو قرار
يبقى عا ضهرو نايم ويشرب حسا
هوّي مرشّح مستقلّ بهالنهار
واليوم منشوف النتيجه بالمسا
**
ديوان شربل
عَ لسان ملكي وصلت الأخبار
وداق السمع جمله ورا جمله
ديوان شربل بالمكاتب صار
روحوا اشتروا بينباع بالجمله
**
شربل بعينينا
علقت يا شربل بينك وبيني
وطلعت الصرخه بقلب دينينا
هلّلي بيقولوا: شربل بعيني
عم قلّهم: شربل بعينينا
**
دعسة ناقصة
قيموا القيامه.. وزقّفوا ودقّوا النفير
وعَ الهول جيبوا اليوم أحلى راقصه
"الخوري" بدعسه ناقصه بيكبر كتير
وشربل نقص كيلو بدعسه ناقصه
**
عرقات
عرقات يا شربل بدون مراوغه
من "مالطي" بالفعل عا قلبي عزيز
انشمّيت ريحتهم بدون مبالغه
بلمح البصر بتصير تحكي "مالطيز"
**
مسرح
جينا لهوني اليوم، تا نشوف الجديد
ومشوارنا ما ضرّ.. هالمرّه نفع
الديكور رائع.. حضرة الشربل أكيد
حاطط بقلبو إصبع الما بينرفع
**
صيبة عين
قلت لفؤاد: الجوّ بدو يطيب
طالع عَ بالي صيبك بعيني
قلّلي: بعينك مستحيل تصيب
ما زال فيها شربل بعيني
**
عنتر زمانو
بمجلة الغربه صدى لبنان
عصام ملكي قال يا عيني
مين قال عنتر عبس عنتر كان
عنتر زمانو شربل بعيني
**
شقاقيف
شقاقيف شربل بالمحبّه صار
وعا الناس فرّق يا الف عيني
البيكون قلبو عا الوفا بيغار
آخد شقف من شربل بعيني
**
طبيب الأسنان
يا دكتور.. الإبره سنّ
وشربل البعيني داري
وقللو يتهنّى بالسنّ
اللي بدّو يحطّو عياري
**
قطرة
زياره لحكيم العين لمّا عملت
بالآخ قلت تطلّع بعيني
ووقت اللي قللي حط قطره، قلت
ما بحط إلا شربل بعيني
**
شربل بقلبي
قلت.. وكلامي بعيد دايم دوم
إنّو بقلبي شربل بعيني
وبكذب عا حالي ان ما قلت شي يوم
للناس إنّو شربل.. بعيني
**
قديس الشعر
هنيّال قلبو حضرة زماني
النبراس عندو شعر وديانه
شربل الأول عندنا بالدين
وللشعر عنّا شربل التاني
**
هدية
الغربه دني من شربل هديّه
ولوجودنا هيي ضروريه
منصول فيها كلنا ومنجول
ما بين صوره وبين خبريه
التزوير منّو عندنا مقبول
وما منقبل بضاعه بزاريه
ينقال منها "راس" مش معقول
علاماتها ميّه على ميّه
عنها صحف عم ينقلو عا طول
مش حبتين على الارض هيي
ببيوتنا وعا الهاتف المحمول
عم عيش فيها وعايشه فيي
بدنا جهد بدنا خبر مسؤول
مش حب ذات ولا انانيه
يا شربل بعيني بصراحه بقول
مجلة الغربه للحياة ملف
بيطالعوه الناس يوميّه
**
شربل الغربة
يا ناس بدّي من الصبر عينه
مني وقع عا الأرض تلتيني
في ناس فيهم داقق الهريان
حاطط حواجز بينن وبيني
وعم يكترو الاشكال والالوان
وعا كل نافخ صدر يا عيني
هللي بيقولو للذكا عنوان
بالفهم وينن بالدني وويني
كفّار صارو طلّقو الايمان
مفروض إلهم نشمط الدينه
يا أحمد وحنا ويا إبن فلان
شربل الغربه من صبر ايوب
لا تعيطولو شربل بعيني
**
حل العقد
ضايع بحالي وما عرفت ويني
وساعة خلاصي صبتها بعيني
الهاتف برم عا خلقتي بوزو
لما لقى ما بقيت عم عوزو
حل "العقد" يا شربل بعيني
**
شمس وقمر
لشربل بعيني القلب دقّلي نمر
وسألت عنّو كامل وزيد وعمر
ولمّا الوجع بالراس ع زنودو شمر
وتا إقعد على السكت إلهامي أمر
سألت الدني شو صاير بجاه السما
قالت بسيدني شمس عم تاخد قمر
**
مجلة بعيني
مجلّة بعيني اسمها: غربه
كوّن ما بيني وبينها قربه
منها جديده المعرفه من سنين
حضرة خيالو ساكن بقربي
عندو الصداقه والمحبّه دين
ما بيهضم مشاريع منوربي
بيقول متلي طبّقو قوانين
لزرع الثقه تا تصلح التربه
انقالو إلو الأصحاب عطشانين
عا دمّتي بيدلق من القربه
من حيث قلبو من تلج صنين
عن منهجو أمثال منضربه
جايين يا أرز الجبل جايين
الغنّو لها واللحّنو سربه
وعا الوزن ذاتو ابن بشمزين
لشربل بعيني اليوم عن بيقول
من غربتي جايي على الغربه
**
جياب الصداقة
وين القلوب الواعيه وويني
ما عاد فيهن رجحت العينه
جياب الصداقه أعلنوا الافلاس
وكبر الدني عم يزغر بعيني
ودار الجدل عن قيمة الإحساس
ما بين بيني وبين ما بيني
حسّبت بعيوني جميع الناس
ومن بعد ما بقبشت ليل نهار
ما لقيت إلاّ شربل بعيني
**
مشغول
بريت صابيعي وخطّك المشغول
باقي عَ حالو.. والفكر مشغول
يمكن عم بتحكي مع الحلوين
هللي إلك قالوا ظريف الطول
مع مين عم تحكي كنت مع مين
البنت الفلانه أيش عم بتقول؟
حاجي عّ ورقه تسجّل عناوين
وعَ كل ظرف تحطّ ورقة بول
تزوّج بقى.. حاجي قليل الدين
عمر العزوبيّه حرام يطول
نحنا بدنيي ملوّنه تلوين
حلّك بقى تنقّي يا شربل لون
تا نقول منّو عالمك مشغول
**
شربل والباشا
مين قال الفن تلاشى
صاير أحسن من ما كان
محمد زهير الباشا
عن شربل عامل ديوان
الكلمه زخمي بقماشا
فيها مجبول الإيمان
الفكره عطيناها معاشا
علاّ فيها وشاف الربّ
وقلّو تفضّل ع لبنان
**
راعي القطيع
شربل بشعرو انعدّ راعي للقطيع
شاعر قدير وعبقري وشعرو فظيع
مجالو مجال النسر بالجوّ الوسيع
ومتلي بيغنّي شعر للخصر الرفيع
شربل بعيني كان من مدّة زمان
واليوم شربل صار بعيون الجميع
**
بالفكر بيضلّ
لشربل قلت: يمكن نجي.. علّق
عَ كلمتي، وقللي: تعوا هلّق
عَ طول قلبو بيفتحو للضيف
تزوّج "يا أهلا" ولا تجوا "مطلّق"
فصل الشتي عندو عَ وزن الصيف
من المستحيل الرعد يتخلّق
والجو عندو للبسط والكيف
الـ بيغط عندو بينسمى محلّق
يا حيف ع الما قدّرو يا حيف
من كل كلمه صادقه تملّق
نحنا المقام منعملو للطيف
وما زال شربل بالفكر بيضل
بشخصيتو منضلّ نتعلّق
**
شربل الشعر
شعر فصيح
لبنان أينك؟ والآمال تنهدمُ
أين الوفاق.. وفيك الجمع ينقسمُ؟
بالأمس كنت لأهل الفن أغنية
واليوم أنت صدى الألحان تحترمُ
أين الذين بهم تنشل أزمتنا؟
أين الذين بهم تُستفقد الهممُ؟
بيع الضمير، به الأسواق صاخبة
والصدق أقسم أن الصدق ينعدمُ
يا سالبين حقوق الشعب ويلكم
يوم العدالة بالمسلوب ينغرمُ
مات الضمير، ومات الكهل يا غضباً
فاق التصور ان العطف ينهزمُ
الجوع أطلق في الاجواء صرخته
والماء فيه جفاف الأرض ينصدمُ
إن ضجّ صوت له الآذان صاغية
واهتز شعب فقد يختارنا الصممُ
تدعو الأصالة لاستيعاب مرحلة
إن كان فينا جمال الخلق يرتسمُ
فالسلم قيل بهذا العصر مهزلة
لا يرغب السلم من بالشر يعتصمُ
ما ظلّ فينا من الايمان خردلة
فنحن صرنا بنحن اليوم ننتقمُ
ناديت شعبي وما للحب من أثر
يا ليت عمري بماذا الشعب يلتئمُ؟
قولوا لظالمنا: ما نحن مضحكة
حتى تضيع على أعتابنا القيمُ
بيت القصيد له الأوزان راضخة
والحبر جاء بما يحتاجه القلمُ
قال الأديب: "ذئاب الشعب" تنهشنا
والظرف ليس بهذا النهش ينسجمُ
بات الظلام لضوء الشمس مقتحماً
والوعد صار بخيط الوهم ينحزمُ
لبنان فيه عيون الناس شاخصة
والقصف مائدة والموت يلتهمُ
يا شربل الشعر.. كم أصدرت من كتبٍ
عن غفلة الشعب في أضواء من حكموا
أعطيتنا قمماً بالشعر نجهلها
حيّاك ربّي.. لك الأيّام تبتسمُ
أنت البعيني.. و"الأحباب" أعجبنا
علّ الكتاب به تستيقظُ الأممُ.
**
العالم أجناس
شربل ريّس بالإيناس
عَا الصخر بيبني أساسو
ما بعمرو أعلن إفلاس
عمّا يرهج إلماسو
العالم بيقولو: أجناس
وجنسو مبهرج حلاّسو
لو صلّينا بالقداس
منذكر شربل بالكلمات
ومنقول اللطف لباسو
**
شاعر سيد
شربل عريف "ترابيان"
وشاعر فوق المنبر سيد
كلما يمرق شهر زمان
منشفلو ديوان جديد
بعدو أعزب يا إخوان
بينقل من حفّه لحفّه
الظاهر بدّو تلات نسوان
تا تصير الزيجه توفّي
**
معزوفة
لما بنكزه تغيّرو ظروفي
وصارت زهور الحبّ مقطوفه
عجنت الحكي بعلامة استفهام
وكومة نقط حطّيت ع حروفي
وشلحت خلفي حالة استسلام
صارت لكل الناس معروفه
وقلت بدّي إسأل الأحلام
مين الـ عمل للجوع لفلوفه
صرت بجهودي إفشخ لقدام
وبقبش تا حقّ المعرفه أوفي
ولمّا الفحص حوّل ع صفّ كلام
شفت القلق مصفرّ نتّوفه
سألت العيون الـ صار فيها تنام
تا تفسّر بكلمات مألوفه
قالت يا عيني قلبت الايام
من بعد ما كان البخل قنطار
شربل عطى للحب معزوفه
**
شربل بعيني بأقلامهم
يا كلارك انت الكاتب الحساس
ومنجم فكر ما بيعرف الإفلاس
طلّة كتابك كان بالتأكيد
طلّة صبيه خدّها ما انباس
شربل بأقلامن وصل للإيد
وشكري إلك بالفعل ما بينقاس
الرابع تا يبقى (بعترض) ما بريد
خمّس تا حتّى يصلبولو الناس
شربل بعيني عاشق التجديد
بيقول وزن الشعر منّو أساس
ونحنا انجبرنا عن طريقو نحيد
تا نشوف وين الدرّ والإلماس
يا كلارك البعيني.. بعيني سيد
وتحليلك بيوصل لقمّة فاس
اسمحلي تا إشرب كاسك من بعيد
وعا شنق عينو شربل بعيني
مش رح نقلّو تفضّل عْلى الكاس
**
محمد وشربل
محمد زهير انعرف كاتب شهير كتير
الإلهام وين ما التقى عم يحسب حسابو
كلما خيالو جمع بيزوزق التفكير
وبيصير حرف الهجا يطرق على بوابو
بملاّح باحث ع ربّو حاطط قناطير
بابن البعيني لأنّو زاد إعجابو
وجايي ع دربو أنا إعمل إلو تقدير
ما زال شربل معي بيدور دولابو
ومن حيث إني أنا صادق بهالتعبير
صاير حضورو معي بيشابه غيابو
بالفكر عايش لأنو انعد شهم كبير
وبالشعر صرنا عم منلبس من تيابو
**
لشربل قلت
لشربل قلت: يا شربل الـ قدرك علي
كتابك وصلّي وبالوعي بيغلي غلي
مناجى علي.. وتركت مار شربل إلي
ونسيت مار مارون بالشعر الطّلي
قللي: أنا بناجي بدون مجامله
القديس عندي عابد الرب الولي
وما بين سنّي وبين شيعي.. المنزله
مش فارقه عندي المحبّه مرسمله
ع الراس فوق العين حطّيت التنين
بناجي محمد متل ما بناجي علي
**
يسعد مساك
رح عيدها.. وخلّي الحقيقه تتبعَك
وخلّي الجواهر تنسحب من مقلعك
رح عيدها كرمال أم بتدفعك
عا الخير.. كل ما يكون شامخ مطلعك
وبعيدها.. بتقول يا ما أسرعك
ما في حدا بالفخّ عم بيوقّعك
يا شربل بعيني اللطافه منبعك
وبعين قبل التانيه عم نقشعك
نحنا بحروف الأبجديه منرفعك
وما منطرحك وقت اللي بدنا نجمعك
حبّيت قلّك هالمسا يسعد مساك
صرلي نهار ونصّ مش حاكي معك
**
قولوا مين؟
مين اللي عنّو انقال: يا عيني
مين الإلو ما بينوفى ديني
مين الـ بيشعرو بيخلق التلوين
مين اللي قلبو من تلج صنين
مين الـ بيضلّ مرجّح العينه
مين؟ قولو مين:
شربل بعيني
**
طاولة الشرف
المنّو حدا قاعد عا طاولة الشرف
لا تزعلو انقلنا عم يزيد القرف
في ناس نفخ الصدر جايبلن خرف
وفي ناس صارو من الغنم إلهم طرف
وبعرف أنا إنسان أموالو صرف
ببيت الشعر منشان يستأجر غرف
بقلّو بمجلة شربل بعيني العزيز:
البيكون مش معروف مش رح ينعرَف
**
آدم أبونا
شربل بعيني بالعتم ضوّى
قلبو محبّه وعاطفه مليان
صفحات ماضي مزعج مطوّى
وبعدو وجعها معلّم بلبنان
عا بعضنا ممنوع نتقوّى
ها الحقد عند جدودنا ما كان
آدم أبونا وأمنا حوّا
نحنا قرف عن بوزنا إخوان
**
كلامك حقيقة
يا شربل بعيني العلى شكلك قلال
كلامك حقيقه واقعيه مش خيال
هللي بيقولو ربّها بهيكي مجال
للبال راحه يعملو مش شغل بال
ولاد الخلقنا كلنا والاحتيال
منو لنا والكون رايح عا الزوال
لحفظ الوظيفه كتار بيقولو لنا
هيدا حرام بينسمى وهيدا حلال
**
شو بيمنع
شربل بعيني قال شو بيمنع
باللي عطانا ربنا نقنع
مفروض نمشي كلّنا عا أصول
وعالم ما نطرح بالدني نجمع
عنّا عِيَل تا نموت مش معقول
كلما شي كلمه من حدا نسمع
الشاعر ما كيّل فول بالمكيول
عينو عا كل معذّب بتدمع
كل واحد واجباتو يقول
متل الكَتَب ردّه عا بوسطه وخاف
من الموت لازم كلنا نفزع
**
درب الخلاص
يا شربل بعيني بصراحه قول
لساناتنا بتمشي بعرض وطول
بقيل وبقال عمارنا صرفنا
وحبل الكذب بلساننا موصول
مِنّا بدون مبالغه قرفنا
ووجودنا مِنّو الزمن مخجول
بأيلول قال الحظ شرّفنا
وما حب آب يزقّف لأيلول
درب الخلاص منين ما عرفنا
بدنا حقيقه الكذب مش مقبول
عا خط نار بها الدني وقفنا
وفات عْلى بحر الشعر كم اسطول
وبالنثر ما انحميت مطارحنا
وصرنا برحمة عالم المجهول
وغير الوجع بالراس ما ربحنا
معقول انو نصير مين ما كان
ونحنا تا نحنا نصير مش معقول
**
نتفة عرق
يا شربل بعيني إلك مني سلام
نتفة عرق ممتاز ما عندي بقا
قايل أنا من زمان وبعيد الكلام
عا طعمة الودّيت لا توجّه ملام
عرقات متلن تحت باطك ما التقى
**
مطران وشاعر
قال التقي عا كلمتو هبّو
وقلنا كلام الجوهري عبّو
بدنا الكفر يبعد عن الايمان
تا يصير يقدر يضحك بعبّو
"طربيه" نحنا منعرفو من زمان
بالكاس طول الوقت منصبّو
لكل من طلب منّو نصيحه كان
غبّ الطلب وعواطفو تنبّو
ويا شربل بعيني.. عيان بيان
هللي كلامك طالعو حبّو
طربيه كلّو معرفه ووجدان
وعا ديه عنّا عالم تربّو
وكونك يا شربل زينة الانسان
منّك محبّه نادره غبّو
و"طربيه بونا" بدون كان ومان
هوي بأبانا والذي مجبول
مؤمن وفي وبيخاف من ربّو
**
صدى الكلمه
الكلمه العليها كتار بيردّو
عندي صداها ما انعرف حدّو
"الغربه" بحنانا عاملتلا أم
وشربل بعيني بيّ إلها مهمّ
والسير عم بيقلهم جِدّو
**
موقع الغربة
شاعر أنا.. وكوني ديموقراطي
وصاحب ضمير وربنا العاطي
بقلّك يا شربل والصراحه قوت
عا موقع الغربه عندما بفوت
بشوف الدني صارت تحت باطي
**
شربل حكي
شربل حكي وكان الحرف نعسان
فتّح عيونو وشرّف الانسان
ولمّا لقى إنو الشرح كافي
قال المطالع مش رح نكافي
شربل بعيني.. بيعرفو لبنان
**
فنون
شربل بعيني فنون عا حلّو
المجد اعرفو ما بيطعج ركابو
شاعر وفي بقلوبنا محلّو
ونحنا عا قول الشعر ركّابو
شربل بعيني الضلع منشلّو
حاطط دني وتاريخ بجيابو
لصوبو بيجي بالقدح يا دلّو
بلمح البصر منشلّحو تيابو
هوّي الوفي عا طول عم قلّو
المتلك ما فيه يعدّ أحبابو
ومش بس انّو معرفه كلّو
وعا الأبجديه كاتب كتابو
شربل بعيني كيف نوصلّو؟
لا تسألو عنّو حدا من الناس
دقّو عا بابو بتسمعو جوابو
**
شربل الغالي
يا شربل بعيني إذا ببكي
حقّي معي صار التعب ملكي
يمرق عليك نهار مش معقول
من دون كيفك من ابن ملكي
كان الشغل عندي ظريف الطول
ولبكه وراها شاحطه لبكي
دقيقه ما وقّف هاتفي المحمول
مليح الما عندي خط لاسلكي
يا شربل الغالي الصدق عم قول
سيرتك فاتح أنا والحيط
وإلنا شي ساعه ونص عم نحكي
**
تكريم شربل
شربل بعيني طالع بريمو
قلال اللي فيهم قيمتو يقيمو
ماشي بوعي منّو ابن يومين
والجاليه بتعرف ترانيمو
ومليون مره بقول يخزي العين
عا المجلس القدّر تعاليمو
بتكريم شربل عم نرد الدين
البيكون متلو ربنا يديمو
بس الحسود المتل قاف وزين
غلطة زمن بيكون تكريمو
**
شاعر وفي
شروقي
شربل بعيني انعرف شاعر وفي ومهضوم
سجّل بإدن الدني صرخة دواوينو
لا يقول واحد إلي غلطان بالمفهوم
قلبو لكل البشر والمعرفه دينو
للناس قللي أنا بصلي وعا طول بصوم
وان قلت الهم شعر عا الطاير بزينو
لا شك حقّي معي إن قلت عزّو يدوم
ولا شك منهم حدا الما بيعرفو مينو
شربل بعيني خدم ها الجاليه ومعلوم
بالفعل مش بالحكي وبتشهد سنينو
**
شاعر عصامي
شاعر عصامي وزهرتي جنينه
ممنوع إحسب واحدي تنيْني
وبالانكليزي بألف "ياس وياس"
شوارب بيربّي الما وفي ديْني
ويا شعب ألله جوهر وإلماس
وين أنتو بالدني وويْني
في ناس متل شموع بالقداس
وشمعة "الغربة" شربل بعيني
ممنون عينو للأبد ممنون
عا الراس شربل كيف بدّو يكون
وعمرين صرلو شربل.. بعيني
**
انفلونزا
ـ1ـ
شربـــــــــل بعيني بَعرفو جَبلة وفا
قدَّم شو عندو للجميع وما اكتفى
إنسان مخلص ما عمل إلاَّ المليح
بالمعرفه والمقدره مشَّى الكسيح
يا مريم العدرا ويا يسوع المسيح
وَدّو لشربل من عند الله شفا.
ـ2ـ
ومجلِّة الــــغـــــــربه عظيمة شان
فيها عـــــــــا طول بينقشع لبنان
أستاذ مَنُّو فاعــــــــــــــلو مفعول
ومعلوم منّو عالمو مجهول
ومش بس إنُّو مؤمن عْلى أصول
بالفعل كفرو بينسمى إيمــــــان.
ـ3ـ
عَنُّو حبيب الكلّ بيقولو
فسحه إلو بالقلب خَلُّولو
واللي بيقصِّر لازْمو توبيخ
وبْقول كلمه حدّها من السيخ
شربل بعيني غربتو تاريخ
يا مطالعين الشعر صَلُّولو.
**
يا شربل بعيني بدمّاتي
ـ1ـ
يا شربل بعيني بدمّاتي
بعهد المضى ومستقبل الآتي
سمحلي تا قلّك من قبل ما تشوف
معلّق عا شعري بالحياة الوف
وذاتك أنا معلّق على ذاتي
ـ2ـ
ومنّو البهار بعرفنا قرفه
وصعبه الغلط يتمرّق بحرفه
الما صار صعبه نقول انو صار
الفاتو عا قلبي بالحياة كتار
واللي ما فاتو بيطلعو نتفه
ـ3ـ
بدنا نغم عا العود والقانون
الضمّه ما فينا نقول عنها سكون
بقلّك يا شربل أول وتاني
عرفتك أنا إنسان إنساني
وغير هيك ما بقبل تا حتى تكون
**
أمك متل أمي
يا شربل ما حدا لحّن وغنّى
لو ما الوزن بكلامك تبنّى
الصداقه اليوم صارت مستحيله
اذا بتساير العالم تأنّى
انا انسان جيلك متل جيلي
تا غيري كون مش عم إستمنّى
أمّك متل أمّي ومش قليله
إذا بأوصافها وجودي تغنّى
شاعر انت ومسجّل زميلي
وزمانك فيك عا الطاير تهنّا
بقلك بعد آخات الطويله
اجا لعندي اللي اسمو مار مينو
تا حتى يقول انو مار يوحنا
**
أنا
يا شربل بعيني الحرف فيك اغتنى
وغربة حياتي فيك بتنال المنى
راسي اندوخ ما عرفت عا أيا بنى
وصرت العتابا قول عنها ميجانا
الليله عيوني غمّضو وراسي انحنى
وشفت العذاب الما إلي عنّو غنى
ولما فقت من بعد ساعه من الزمان
إقبر حياتي حسّبت إني أنا
**
وسام
بآل البعيني فاخر زماني
ومنّو لحالو دحرج لساني
يا شربل بعيني الظريف الطول
أصحابك وْسام عْلى صدرك قول
وهلّق إجاك وْسامك التاني
**
زماني
كتابك يا شربل رافع جبينو
وبمطالعه كترو محبينو
الشذى طوفان من عبقة ورودو
بعيني كبير عند العارفينو
انا عم قول بالرحمات جودو
تا حتى موقفي يقرّص عجينو
شربل قال من غربة وجودو
بعتولي نهار من شهر الفلاني
اذا كنتو زماني شايفينو
**
أسلوب
ماشي بزماني وما عرفت ويني
لو ما وقع عا الارض تلتيني
تا شوف حالي عامل مواعيد
مع كم أنا وما بينوفى ديني
منّو العتيق بحكم شرعي جديد
ما قلت مره واحدي تنيني
ألله خلقني للمحبه سيد
وما في حواجز بينها وبيني
بقول بصراحه والكلام بعيد
بقلبي عشر أصحاب يا عيني
وبعين عندي للغمز أسلوب
وبعين عندي شربل بعيني
**
ملك
شعري شعاعو ولّع نجوم الفلك
وقلّي المعنى عندنا مستقبلك
وشربل بعيني قال منصوّت الك
ولمّا لقيت الكيف احساسي امتلك
العصفور قلّي بزقزقه شاعر عظيم
وهلّق علينا صرت يا ملكي ملك
**
اصبع شربل بعيني
شربل بعيني بالفضا حلَق
ما تملّق ولا حبّ يتملّق
معروف إعلامي بطل بيدير
الكفّه.. وكلام الصدق ما طلّق
نحنا إلو عم نحفظ التقدير
عا سلّم الالهام متسلّق
بغير الوعي ما جنّد التفكير
ومن حيث ما بدّو دعايه وصوت
ما في حدا عا "إصبعو" معلّق
**
تمثال
بشربل بعيني حالنا منشوف
للمجتمع ما بينوفى دَيْنو
علوّاه لو متلو في عنّا ألوف
"تلتو إلو" وللناس تلتينو
ع سفرتو حروف الكتيبه ضيوف
وحرف السقط عم تنشمط دَيْنو
وما في خلاف من الصبر محذوف
بيني قدر تا يوقف وبينو
عليي شبح بالحلم صار يطوف
عا الواقع ويغمز إلي بعينو
وقللي يا ملكي الشاعر المعروف
قول لـ "مجدليا" بلسان الحال
تمثال شربل.. دخلكم وينو؟
**
حبيب الجاليه
شربل بعيني ربّنا يعينو
التاريخ لولاه احترق دينو
كل يوم عم يعطي زمانو جديد
وحرف الهجا بيعرف قوانينو
ما بريد حقّو ينهضم ما بريد
بشهد إلو وبتشهد سنينو
صاير كلامو للوعي زواويد
وما بيشبعو منو محبينو
شربل بعيني بقول بالتأكيد
ما بتنحصى كترة دواوينو
من زمان قلت وكلمتي عم عيد
مفروض يعرف حضرة التاريخ
مينو حبيب الجاليه مينو
**
ديوان فافي
ـ1ـ
يحيا الجهاد بفاطمه ناعوت
بواقع وطنها كلامها منحوت
عليها بيصلّي زْمانها وبيصوم
وفيها قيامة شعرنا بتقوم
من باب واسع عا الوحي بتفوت
ـ2ـ
تا إهرب من الحقّ ما فيي
فافي.. بتجي عا البال يوميّه
عذري معي إن صبتها بالعين
مش بس عندا أم.. عندا تنين
والتانيه.. أم الدني هيّي
ـ3ـ
ببنتِك يا مصر بقلّك تهني
إلها الدني مواويل بتغني
بحلف على الانجيل والقرآن
بالمتل "فافي" تشرّفو الاوطان
ومَنّي أنا عم زيدها مَنّي
ـ4ـ
بـْ "فافي" ان شكرت بيعرضو كتافي
وأحلى من الـ "فافي" حدا ما في
شربل بعيني الحق عنها قال
ولما كتابو خلّصو بالحال
قلّو الزمن يعطيك العوافي
ـ5ـ
شربل بـ "فافي" بمنطقو العلمي
بيقول إلها محبتي استلمي
ولما أنا بكتاب "فافي" قريت
حسّيت حالي عا الأرض ما بقيت
ومفروض إلها توصل الكلمه
ـ6ـ
بشموخها طلعت على المريخ
ببيت العداله شافت فساويخ
عطيت قلمها للشعب والروح
وهيي على التاريخ ما بتروح
بدّو وراها يركض التاريخ
ـ7ـ
كل الشعب من فاطمه ممنون
عا ألوف فيها كل ساعه تمون
كل العقد بوجودها بتنحلّ
انكان العدل عا الارض عندو محلّ
لازم رئيسه لمصر هيي تكون
**
سفير ومطران وشاعر
ـ1ـ
يا سفير بلادنا والطف سفير
الفكر بوجودك سجّل الكلمه بعجل
لو كان فينا من نبوغك نستعير
منفتح مدارس للقصيد المرتجل
ـ2ـ
لا شك إنّو كلمتك سكّر نبات
كونك أديب وأربع فصولك ربيع
نيّال هالبيكون متلك بالحياة
اسمك "لطيف وبو الحسن" بي الجميع
ـ3ـ
بلسان نحنا بقول أهلا ومرحبا
وشربل بقللو: عا التبعزق يا لطيف
معنا السغير اليوم وفّر كهربا
منها جريمه انكان مصروفك خفيف
ـ4ـ
ويا سيادة المطران انت الزنبقه
والمزهريّه والوعي وغب الطلب
للمجتمع قلت بجناح مشبّقه
ممنوع حرف الأبجديه ينصلب
ـ5ـ
بمواهبك دقيت عا بواب السما
والحاضرين بيعرفو مقامك رفيع
مش انت "مرعي" انت راعي بتنسمى
وقدّام عينك بين ايديك القطيع
ـ6ـ
ويا راهبات القدركم عنا علا
بعيوننا بتبقو لدهر الداهرين
صلولنا منشان تا نطلع على
قرص السما وما نضل بين الكافرين
ـ7ـ
ويا "أم شربل" أم شاعرنا الوفي
قولي لكل من قال كلمه وابتسل
الشاعر اذا بيجبل خيالو بمعرفه
بتطلع بيوت الشعر أحلى من العسل
ـ8ـ
لازم عا صخر الوزن نبني مملكه
يصرف عليها الفكر من خرجيّتو
صار الشعر بالمغترب كومة حكي
بضرب الرمل ما بتنعرف نوعيّتو
ـ9ـ
ومنّو الشعر بالوزن وقوافي فقط
بدنا القصيده تعرق بتأليفها
وبدنا المعاني تحط عا الكلمه نقط
وما نوقع بنقطه تا نعرف كيفها
ـ10ـ
يا أهل الذوق ونفوس الابيّه
هويّه ما منفرق عن هويّه
نحنا قبل ما خلقنا قطعنا
وعد تا نكون ضد الطائفيّه
بسفير بلادنا المخلص لمعنا
بليله من الليالي العالميّه
وتحت رعايتو هلّق وضعنا
الظروف العم بتحمل بندقيه
وممثل ربّنا مرعي بسمعنا
الأبانا بيترك بلهجه طريّه
راعي للقطيع بمجتمعنا
برساله من صميم الأبرشيّه
ونحنا بعد ما الماضي نزعنا
درسنا الوضع وفهمنا القضيّه
ومنا كل متحجّر نزعنا
تا نبعد عن حياة الفوضويّه
فرطنا عصبة الفيها وقعنا
بفخ الكنفشه والعنجهيّه
وبعصبه تانيه عدنا اجتمعنا
ورجعت كلمة الشاعر صبيّه
ولو ما نكون عا الغير ارتفعنا
بمجالات الحقيقه الواقعيّه
بعصبة شعرنا ما كان معنا
فطاحل من بلاد الشاعريّه
بكل مجال بيرقنا رفعنا
بقوافي بكر ومقاطع قويّه
وبدم قلوبنا "الغالي" دفعنا
تا نحفظ للشعر مجدو وكيانو
ونرفع راس حرف الأبجديّه
ـ 11ـ
"مجدليا" بخد الكون شامه
عا شفّتها بلاد الابتسامه
غمرها ربنا بروحو وعطاها
المحبه والوعي والاستقامه
بنخوة شعبها العالم تباها
وعا ديها انقال بتقوم القيامه
الشهامه بحر والحسن بحلاها
ولشط الريق بتموّج كرامه
الهجرها وغاب عنها ما نساها
معو بتضل بالصفّ الأمامي
عا وجه الأرض ما بيقبل سواها
اذا بيتكوّمو عليه ألسامي
ولأنّو المستوى من مستواها
الصخر وترابها تفاح شامي
وحمامه.. "شربل" بقبّة سماها
اذا الطوفان بيثبّت وجودو
لسفينة نوح بيجيب العلامه
ـ12ـ
وهالبيت بيت لدار دولابو
وبيضلّ متعلّق بأحبابو
هالبيت بيت "الشربل" المشهور
وامو الما فيها تعيش بغيابو
هوني الوعي والذوق.. هوني النور
وهوني الحرف عم يلبس تيابو
وهوني "اليا أهلا" مشكّله بزهور
وهوني السؤال بيعرف جوابو
وهوني القداسه بتحرق البخّور
وهوني الكرم عم يقلب جيابو
وهوني بلاد الخاطر لمجبور
وزوّار هوني كل أهل البيت
واللي بيزورو البيت.. أصحابو
**
سنين المعرفه
يا طايرين بها الفضا غطـّو
وكلمه بدم قلوبنا خطـّو
وقولو الأبانا ونؤمن وآمين
وبالمجتمع حيطانكم وطـّو
شربل بعيني كلمتو بيزين
وبيسامح العا منهجو تسطـّو
وهيدا كتابي من حصاد سنين
"من المعرفه".. وجايي بإذن الرب
هلّق عا بيدر ها الزمن حطـّو
**
صداقة
شربل بعيني وسمعتو بدينه
وبينو التفاهم قايم وبيني
عندو الصداقه معمّره عا اصول
وعا اساسها منقول يا عيني
فضلو تا ننسى الف مش معقول
بعيد الوعي هوي بسترينه
يعني عا وزن الشعر بقدر قول
ان كان في انسان عندو ذوق
بيكونو اسمو شربل بعيني
**
فلان
أنا إنسان عندي الضغط حامـــي
وشو عندي بْقُول وبثبِّت كلامـي
بِمْدح نـــــــــــاس وبوجِّه إهانـه
لناس بْدون مــــا أذكـر أَسامــي.
عندي المفْتِكر عندو مكـــــــــانِه
وعامــــل عالبشَر مندوب سامي
وعندي المِن عَـــــدا حِجِّه إجاني
بطول لسان تــــــا يشوِّه مَقامــي
وعندي الصــــار محروق الديانه
بعد ما كنت عــــــم حطُّو أمامــي
وعندي فْلان وفْلان الفلانــــــــي
وجَماعَه للوَفا والصــــدق عندي
منهم شربـــــــل بعيني العصامي
**
قالت الارزات
ـ1ـ
شربل بعيني قالت الأرزات
بلعب الورق لبناننا فتّو
ومن قلب قلبو سحب اللهفات
وقلّن تلج ع جبالنا شتّو
ـ2ـ
يا شربل بعيني ع لقمه وكاس
قلي الوفا الما بينك وبيني
شربل بعيني وبعيون الناس
بيضل إسمو شربل بعيني
ـ3ـ
إنت خلقت إنسان إنساني
وشعرك شعورك واللطف موزون
صرلو زمان يقلّك زماني
هيك الصديق يكون أو ما يكون
ـ4ـ
ببيوتنا بدنا الشعور نشوف
قال الشعر قيراط ما عنا
وللشعر قال الشاعر المعروف
الواقع بسلّة تين مش منّا
ـ5ـ
ويا شربل بقلّك بهالموضوع
كم كلمتين زغار وبيتبع..
الشاعر بيشبع لو خلق بالجوع
واللي خلق جوعان ما بيشبع
**
قلال
يا شربل بعيني العلى شكلك قلال
كلامك حقيقه واقعيه مش خيال
هللي بيقولو ربّها بهيكي مجال
للبال راحه يعملو مش شغل بال
ولاد الخلقنا كلنا والاحتيال
منو لنا والكون رايح عا الزوال
لحفظ الوظيفه كتار بيقولو لنا
هيدا حرام بينسمى وهيدا حلال
**
مقاطع من قصيدة
الى أبو حبيب
ـ1ـ
بسدني النثر عالشعر عامل انقلاب
صار الضمير الحي بدّو مراجعه
شربل بعيني قال ما بطلع كتاب
ما زالهم اخدو الحروف مقاطعه
ـ2ـ
وكلمة الاولى لربنا هيي
ومسجله عا صفحة اللاهوت
والتانيه صارت علانيه
شربل بعيني وفاطمه ناعوت
ـ3ـ
وبقلك وهيدا حكي يوصال
وبالعرض نحنا السلّم حملنا
وجوزاف بو ملحم لشربل قال
من عيون "فافي" خلاص ما إلنا
ـ4ـ
ونخّول صارت قاهره ظروفو
وبلش عليها يدخن سواكير
وجوزيف نادر نادر نشوفو
وشربل بعيني الحظ عندو كبير
**
وين تمثالو؟
يا مجدليا كبارنا قالو:
شربل بعيني وين تمثالو؟
شاعر قدير وجبلتو إلهام
بغير العطا ما بينشغل بالو
بفكرو ما عندو ربع ساعه صيام
مجلّة "الغربه" جامعه غلالو
مليون مرّه بقول: عزّو دام
حروف الهجا عم ينسمو رجالو
عا طول كانت فشختو لقدّام
وشهدت إلو عا الأرض أعمالو
وبمجدليا "بتسأل الإيام":
تمثال شربل وين؟ قولي وين؟
وبعدو الجواب محيّر قبالو
**
يا مجدليا
يا مجدليا بقول وبتنـّي
بشربل بعيني ألف تتهني
إسمك رفع بالمغترب تا صار
عا كل منبر للدني يغنّي
إبنك بسيدني متل نور ونار
وجودو بكل مواقفو تبنـّي
للجهد عندو كل استمرار
ومنـّي أنا عم زيدها منـّي
بيدير غيرو.. وصعب تا يندار
شعرو بليغ وطابعو فنـّي
عندو نثر.. عندو دني أشعار
هنيّال قلبك ألف مرّه فيه
ترانزيت بدّو يروح عا الجنّه
**
يوم محمد زهير الباشا
بمناسبة صدور كتابه "شربل بعيني ملاّح يبحث عن الله".
ـ1ـ
ما بقول أهلا فيكم بندوة أديب
ويسعد مساكم بشطب بوقت المغيب
بكلمة يا أهلا بلّش يدبّ المشيب
ويسعد مساكم صار لازمها طبيب
بدّي شي كلمه لحنها يبقى غريب
تعبّر زياده وتظهر بقالب عجيب
سلاماتنا العتقوا لعشّاق الأدب
لا من بعيد بيلبقوا ولا من قريب
ـ2ـ
يا حضرة المختار"1" رسمك بدفعو
خيط الصله البيناتنا لا تقطعو
تلج العلى صنين قلبك مرجعو
ومنّك شفت هالكنت مش متوقّعو
رحت بكلامك عا السما تقطف نجوم
ومن مجدليا جيت تا تقول: ارجعوا
ـ3ـ
ويا حاصرين على قلب قلبي تعو
وشوفو الحقيقه الصادقه وتسمّعو
الباشا "2" حِكي.. وكان الكلام بموضعو
البيقول مش معقول يرفع إصبعو
ـ4ـ
وكلارك ماضي بمرحله وبختم معو
عا كل هللي بيطرحو وبيجمعو
كلارك البعيني "3" بعين ومحمد بعين
من هيك عين بعين عندي بيطلعو
ـ5ـ
ملاّح عم يبحث عا ألله جوهره
واقف بظل عيارها صفر اليدين
و"وشربل بأقلامن" مسلسل مقدره
وخامس كتاب مصلبينلو بخمستين
ـ6ـ
"باشا" و"بعيني" متل نار على علم
مجدُن ضوي عا كل صفحه معتمه
ومجد الـ "مجدليّا" بأرباب القلم
الفيهم حروف الأبجديه مغرمه
ـ7ـ
شو قيمة الكلمه إذا قلّ الغذا
وجاعوا المعاني الضيّفو عا حسابها
وشو قيمة الفكره الخياليه إذا
البيفكّرو ما لبّسوها تيابها
ـ8ـ
هوني "كليله ودمنة" رجال الأدبْ
وهوني المتل من "بيدبا" عم ينضرَبْ
وهوني "الصدى" و"البيرق" لدعم القرار
وجايي أنا عا حساب صوت المغترَبْ
ـ9ـ
نحنا بندوة كاتب مقامو سما
طعّم كلامو بنكهة السحر الحلال
منها عجيبه نقرّص نجوم السّما
ونرقّ نور ونفرش القاعه جمال
ـ10ـ
لما الخبر بيّن عا وجه المبتدا
قلنا الكَفَر بالشعر ألله يرحمو
محمد رسول الكلمة الفيها اهتدى
الخاطي عا شربل تا الأبانا يعلّمو
ـ11ـ
محمّد زهير.. مفكّر وناقد كبير
بجوهر كلامو طار عقل الصيرفي
قطّف رواقو من جنون الزمهرير
وللأبجديه قال بالصفّ وقفي
ـ12ـ
صاحب قلم وبيعرف أصول الأصول
وانتو وانا منقدّر مقام الذكي
كلما فتحنا سيرتو لازم نقول:
هللي سكوتو بحر بيموّج حكي
**
1ـ الياس أبي خطّار، مختار بلدة مجدليا مسقط رأس شربل بعيني
2ـ محمد زهير الباشا، دمشق، سوريا، صاحب كتاب "شربل بعيني: ملاّح يبحث عن الله".
3ـ كلارك بعيني، واضع سلسلة "شربل بعيني بأقلامهم".
**
شربل بعيني
ذوق عا حلّو
شربل بعيني ذوق عا حلّو
المجد اعرفو ما بيطعج ركابو
ونحنا عا قول الشعر ركّابو
شربل بعيني الضلع منشلّو
حاطط دني وتاريخ بجيابو
لصوبو بيجي بالقدح يا دلّو
بلمح البصر منشلّحو تيابو
هوّي الوفي عا طول عم قلّو
المتلك ما فيه يعدّ أحبابو
ومش بس انّو معرفه كلّو
وعا الأبجديه كاتب كتابو
شربل بعيني ذوق عا حلّو
لا تسألو عنّو حدا من الناس
دقّو عا بابو بتسمعو جوابو
**
شربل الغالي
يا شربل بعيني إذا ببكي
حقّي معي صار التعب ملكي
يمرق عليك نهار مش معقول
من دون كيفك من ابن ملكي
كان الشغل عندي ظريف الطول
ولبكه وراها شاحطه لبكي
دقيقه ما وقّف هاتفي المحمول
مليح الما عندي خط لاسلكي
يا شربل الغالي الصدق عم قول
سيرتك فاتح أنا والحيط
وإلنا شي ساعه ونص عم نحكي
**
شربل بعيني
بينحسبلو حساب
ـ1ـ
شربل بعيني من زغر سنّو
لغيرو، وإلو، القانون بيسنّو
عا كل مفرق بالوعي بلاقيه
وبحب إني قلكم.. إنّو
قلة حيا ما في حدا يهديه
عدة جوائز بالشعر عاطيه
وأول قسط عم آخدو منّو
ـ2ـ
شربل بعيني بينحسبلو حساب
كتفي عا كتفو بها الدني لقيتو
سبحان مين متلو عصامي جاب
من بيوت شعري مساطر هديتو
ومن دون علمي حطّهم بكتاب
وجابو تا يطلع بينكم صيتو
وسيطر عا فكري بشوفتو الاعجاب
وعملت عليي الجائزه فيتو
ـ3ـ
وحسيت اني بحلم يا أحباب
عا دقيقتين زمان توقيتو
ومن هالسما.. من عند ابن وآب
وعا حفلة التوقيع يا أحباب
شرّف عصام حداد عا التوقيع
وإنتو تا حلمي تفسّرو جيتو
**
تكريم شربل
شربل بعيني طالع بريمو
قلال اللي فيهم قيمتو يقيمو
ماشي بوعي منّو ابن يومين
والجاليه بتعرف ترانيمو
ومليون مره بقول يخزي العين
عا المجلس القدّر تعاليمو
بتكريم شربل عم نرد الدين
البيكون متلو ربنا يديمو
بس الحسود المتل قاف وزين
غلطة زمن بيكون تكريمو
**
وضع تعبان
ـ1ـ
يا طالبين الحق صوبي عرّجو
بدّنا حرف عا حرف تاني نزّوجو
وبدنا محبه بها الدني وبدنا أمان
قولو لهونيك وهون ول أيا مكان
شربل بعيني قال كلمه من زمان
أكبر جريمه المستقيم تعوعجو
**
بغداد
شعر فصيح
بغداد أنت بالحقيقة منهلي
عنّي الزمان بكل يوم إسألي
قال البعينيُّ اقوالا نحبذها
والصدق يظهر والحقيقة تنجلي
اسْماعيل افضل والفضائل نهجه
مهر الاصالة بالبراعة يعتلي
حيّاه ربّي بالغناء لأنه
ما قال يوماً للإجاص سفرجلي
**
أنا
يا شربل بعيني الحرف فيك اغتنى
وغربة حياتي فيك بتنال المنى
راسي اندوخ ما عرفت عا أيا بنى
وصرت العتابا قول عنها ميجانا
الليله عيوني غمّضو وراسي انحنى
وشفت العذاب الما إلي عنّو غنى
ولما فقت من بعد ساعه من الزمان
إقبر حياتي حسّبت إني أنا
**
انت ابن الأم
هالكلمة اللي قلتها عملت صدى
يا شربل الفيك الخبر والمبتدا
مش ممكن تسخّر ضميرك بالحياة
البيقول منّك هيك عا الصدق اعتدى
كلامك بشرع المجتمع سكّر نبات
يا ريت عنا ناس منّك تنعدى
حضورك ع جلسة شعر اسمو مقبلات
بوقت العشا بيروح وبوقت الغدا
انت ابن الأم هالعندا صفات
وما كان عندا صوت صارخ بالودى
وقال المتل كلمه في إلها معطيات
وبالفعل كانت صوت ع طول المدى
وحتّى معك هاليوم إعمل واجبات
بعيون أمو القرد أحلى من الغزال
لكن عند أمك يا شربل مش حدا
**
غربة صديقي
ضيّعت حالي وما عرفت ويني
من ها التهاني السمعتو دينه
كتار اللي كتبو واحسنو التعبير
بغربة صديقي شربل بعيني
حبي لهم ما بينسمى حزازير
عشره طويله بينن وبيني
بدقّات قلبي بدفع فواتير
لكلام عدّيتو بسترينه
ومن حيث انو الحب حجمو كبير
بشكر جميع العايدوني كتير
وشربل بعيني الصايبو بعيني
**
أصحاب
ـ1ـ
ضعت بأنا.. ومش منعرف ويني
تخمين صارت خمستي تنيني
بالعرض ما بقشع ولا بالطول
هللي ما وفيو بصحبتي ديني
المعقول عندن صار مش معقول
وبتضل تعلق بينن وبيني
وحياة ألله مية مره بقول
حطيت بعيوني كذا أصحاب
ما ضل إلا شربل بعيني
ـ2ـ
مكفّى يا شربل إنت وموفّى
عا سيرتك بالبرد بتدفّى
وهلّي حسبتو بدر صار هلال
بدّو عا ضهري يصرّف الأعمال
بأول لقا تا اضرب الأمثال
إسم الأفندي بقلّك بموال
وتا الوشوشه تمشي براحة بال
بخلّي الحرف هونيك يتحفّى
**
زوار نحنا
يا شربل بعيني.. الوحي أسرع
بوصفك لأنو كاسك منكرع
الظاهر انت مجبول بالإحساس
بوجه الأوادم بابك مشرع
إسمك ذكرتو وشربت كم كاس
وقلت لأنا تا بشعر إتبرع
زوار نحنا متل كل الناس
ومتل الشجر يبيسنا منفرع
ولما النهايه بتنتهي بقداس
وبيصير بدو العظم يتفرع
بتصير بزره روحنا وبتطير
صوب السما تا بغيرنا تزرع
**
شربل بعيني
منارة الحرف
ـ1ـ
يا شربل بعيني عا أمثالك
منحب نحنا نشوف.. نيّالك
هيدا كلام عليك منو جديد
بغير الأدب ما بينشغل بالك
بقلّك أنا وبعيدها وبزيد
بحيثك مناره للحرف بتضل
كيفتا ع غيرك ما قشعت حالك
ـ2ـ
الست البهيّه مين متلا مين
بهالعصر صاير إسمها عناوين
مش بس معروفه محاميه
عملت لنا بالشعر جمعيه
وصارت سفيره للسلم هيي
عنك كتابا متل غنيّه
بميتين صفحه وفوقها عشرين
**
خمس آهات
يا شربل بعيني من كلامي
إلهم سنه يتشردقو قلامي
لا تقول انو قهوتك عا النار
ما قدرت صوبك كمّل المشوار
دعست بخمس آهات قدامي
**
يا اهلا
كونك يا شربل من بني قومي
واليوم كنت محسّبو يومي
بدقات قلبي ما قدرت حاكيك
ولا قدرت هلّق قول: أهلا فيك
كانت "يا أهلا" فاقعه نومه
**
جائزة اليوبيل
1ـ
نحنا لربّ الكاينه عبّاد
وأصحاب كلمه والحروف ولاد
باب الأدب والشعر عا عيني
مغلوق كان.. و"شربل بعيني"
المفتاح جابو من "عصام حدّاد"
ـ2ـ
حروف الهجا من جبيل.. من لبنان
أشكال عطيو للدني وألوان
اليوبيل فضّي متل ما قالو
الإخدو ضروري يقشع بحالو
بقصر الأونيسكو احتفالو كان
ـ3ـ
بقدّم تحيه لكلهم منّي
شم الهوا عا ذكرهم سنّي
من جهّة الإعلام في "ليليان"
و"شوقي دلال" المبدع الفنان
وأربع فطاحل بالشعر هنّي
ـ4ـ
"إبن السعاده" العبقري "أنطون"
و"الياس خليل" الما عليه دهون
فوق المنابر كل واحد سيد
و"روبير خوري" الرب عمرو يزيد
وريّس نقابه "جورج بو انطون"
ـ5ـ
العم ياخدو شهادات وقفو صفوف
"شربل بعيني" عامل المعروف
وست "البهيّه" بجوّها فرحنا
ومنها بعيده بجهدها نحنا
نجوم الضهر ساعة ما بدنا نشوف
**
فراطه
يا شربل بعيني الوفا جابك
تا ناخد فراطه من جيابك
الكلمه ما فينا نقلّها فلّي
ان كان فيها تفصّل تيابك
إنه ما فيك وما التقى علّه
وليل ونهار بينطرق بابك
عنك اذا ما كتبت يا دلّي
بيشارعوني الناس بغيابك
كلمن بيقرا شوي بيقللي
كتابك عن بعيني بصدق مجبول
رح اكتب كتابي على كتابك
**
ضايع أنا
ضايع أنا ومش منعرف ويني
لعدة صداقه ما انوفى ديني
وبقول بالعالي وعلى الوشوَيْش
بتضل تعلق بينُن وبيني
ما بحب إني دوق مر العيش
بدي صداقه ترجّح العينه
من أيش بعض مشاكلي من أيش
وعاطي أنا للغير تلتيني
وليل ونهار بقول كيفتا وليش؟
شربل بعيني من زمان بعيد
وقالت صبيّه: شربل بعيني
**
عيد 68
يا شربل بعيني من بلادك
انتْ أرزه وشامخه عمادك
ألله عطاك بهالدني وزادك
ومع كل مخلص منقسم زادك
قلنا عا عشره شباط من يومين
عا تمانيه وستين يخزي العين
عنا بسيدني صار ميلادين
عيد المسيح وعيد ميلادك
**
ما بقدر اغمز
قاطع بالدنيا مسافات
والواحد صار تنيني
ما بقدر اغمز ستات
شربل بيضل بعيني
**
عظيم الشان
مش كل واحد بالذكا حلّق
وعا كعبة فكارو شعر علّق
شربل بعيني بصفحة التاريخ
مسجل عظيم الشان من هلق
**
فاري كود
شربل حيثو "فاري كود"
بدونو ما بعرف ويني
بعيون العالم موجود
بحلف مش بس بعيني
**
أمك وأمي
بقلّك يا شربل شدّ ها الهمّه
بحكم القدر في عندك مهمّه
غلطان هال بيقول عندي أم
أمّين عندي: أمك وأمي
**
ممتاز
يا شربل بعيني بلا اشمئزاز
الدوري ما فينا نقول عنّو باز
عن كل شعر بتكتبو للناس
العالم بيقولو: شو حلو وممتاز
**
إهداء
ـ1ـ
تالت طبعه من كتابي
رح قدّمها لأصحابي
حتى يقولو لشربل خيّ
شعرو شمس، وجودو فيّ
وترابو متل ترابي
ـ2ـ
شربل بعيني منهجو من منهجي
ما في حدا بيقول دربو معوعجي
كل ما التقينا وسجّل وجودو الكلام
منّو لحالو الشعر عا بالي بيجي
ـ3ـ
ماشي بيتقوى وحافظ وصايا العشر
البيقول عنا "أحسن" بقللو فشر
سألتو عا قلبو.. قال مشكل ما معي
بالرغم إنّو زارك بقلبو بشر
ـ4ـ
ماشي عا خط الإستوا وباقي
متلو أنا عم دوخ تا لاقي
ان كان النقد "بنّاء" عندو عال
وبيرفضو إن كان عشوائي
ـ5ـ
صاحب ضمير الحق بيذيعو
وصوب السما بيضل تطليعو
وشاعر أنا وعندي ضمير الحي
ان ما ضلّ عندي فرنك ما ببيعو
**
